“विश्वप्रसिद्ध पुस्तकहरू हर्मन हेस्सेको ‘सिद्धार्थ, जोस्टीन गार्डरको ‘सोफिज वर्ल्ड र तिक न्यात हन्हको ‘जहाँजहाँ चरन परे गौतमके जत्तिकै पढ्नमा आनन्द आउने गहकिलो र सुरूचिपूर्ण पुस्तक |” –  अभय श्रेष्ठ, लेखक

“भागवत गीता दुर्बोध्य र जटिल मान्ने आजका मान्छेका लागि अत्यन्त ग्रहणशील शैलीमा विशद ज्ञानलाई यति बँदिलो गरी बुझाउन सक्ने यस्तो पुस्तक मैले यसअघि कहिल्यै पढ्न पाएको थिइनँ ।” – टीकाराम यात्री, टेलिभिजन प्रस्तोता

“मोक्ष जीवनकै मूल पाटो हो भनी जोडदार रूपमा सन्देश दिने गहकिलो पुस्तक ।” –  कल्याण श्रेष्ठ, पूर्व प्रधानन्यायाधीश

“नेपाली साहित्यमा यो खालको आनन्ददायी पुस्तक मैले यसअघि कहिल्यै पढेको थिइन । तनावमुक्त हुन, सत्य र आनन्द चाहनेले पढ्नै पर्ने कृति ।” – बालकृष्ण बस्नेत, पत्रकार

यो जीवन नामको तत्त्व के हो ? मरेपछि यो सकिन्छ कि निरन्तर रहिरहन्छ ? मानिस दुःखी किन छ ? यो दुःख के हो ? यसबाट छुटकारा पाउने कुनै उपाय पनि छ कि दुःख नै जीवनको सत्य हो ?

उपन्यासकी नायिका मोनिका भन्छे, ‘खानु, पिउनु, बिहा गर्नु, छोराछोरी जन्माउनु र हिंड्नु मात्रै जीवन हो भने यो झर्कोलाग्दो छैन त ?

यस्ता प्रश्न ज्यादातर दर्शनको रौंचिरा प्रमाण खोज्दा गर्ने गरिन्छ । सिद्धान्त र दर्शनको नीरस गन्थनमन्थनमा उत्तर दिने परम्परा छ । आख्यानमा पढूँ-पढूँ लाग्ने गरी यस्ता प्रश्न, पात्र र भावभूमिको सिर्जना सायदै भएको छ । यस अर्थमा एक कोसेढुङ्गा हो निर्वाण |

यो मूलतः प्रेम, आनन्द र सत्यको त्रिवेणी हो भने मनोविज्ञान यसको आधारभूमि | सत्य र आनन्द चाहने सबैलाई तान्ने पुस्तक हो यो । विधामा आख्यान भए पनि स्वाद यसको उत्प्रेरणादायी पुस्तकको छ । पढ्ने हरेकले आफैलाई भेट्नेछ, आफैलाई पाउनेछ | सनसनीपूर्ण घटनाक्रम र पात्रहरूका विस्मयकारी मिलन अनि विछोडले पुस्तकलाई अत्यन्त पठनीय बनाएको छ ।

युवादेखि पाकासम्म सबका लागि उपयोगी र उपयुक्तसमेत हुनु निर्वाणको अर्को विशेषता हो । मनोविज्ञानलाई यति नजिकबाट उधिनिएको नेपाली साहित्यको विरलै आख्यानमध्येको एक हो यो ।